Galería
Marea Amaia
O concerto gratuíto de Amaia Montero nas Festas da Peregrina 2009 superou todas as expectativas e converteu a praza da Ferrería e todos os seus accesos nunha marea humana. Adultos, adolescentes e pequenos… xente de todas as idades asistiu a escoitar á ex componente de La Oreja de Van Gogh, quen dixo sentirse emocionada polo contorno e por volver unha vez máis a Pontevedra. Esta era a primeira vez que visitaba a cidade dende que comezou a súa carreira en solitario, pero xa actuara antes co seu antigo grupo, tamén nas Festas da Peregrina.
Un verán de festa.09
A música é o nexo das actividades da programación das festas do verán 2009 pontevedrés, que comezaron oficialmente o día 11 de xullo coa Romaría de San Bieito e o X Memorial Ricardo Portela e rematarán os días 4 e 5 de setembro coa Feira Franca. Entre tanto, haberá actividades para todos os gustos e todas as idades e, como non, as Festas da Peregrina, entre o 8 e o 16 de agosto.
Xornada de break-agarrado
A calurosa xornada do sábado 30 de xuño tivo en Pontevedra dous focos de danza completamente diferente. Por unha banda, a explanada exterior ao Local de Música de Pontevedra acolleu o Jam da Chicharra, festival de cultura urbana que puxo fin ao programa ‘Noites abertas 2009’. Por outra banda, o río dos Gafos foi o escenario dunha merenda campestre onde Os Chichisos ensinaron aos asistentes diversos bailes agarrados tradicionais galegos. Esta actividade puxo fin ao programa ‘Maio, mes da lingua 09’que, ao igual que ‘Noites abertas’, depende da Área de Dinamización Sociocultural, xestionada pola concelleira Anxos Riveiro.
Maios 2009
A Festa dos Maois 2009 celebrouse o día 1 de maio na praza da Ferrería, onde a autora Astrid Filgueira Álvarez deu a benvida ao maio. Houbo tres premios en cada unha das categorías do concurso: maios, cantigas, interpretación e coroas. Mentres o xurado estivo deliberando a resolución dos premios, as pandereteiras de Soutomaior puxeron a música. Finalmente o CEIP Marcos da Portela (Monte Porreiro) gañou o Premio ao Mellor Maio; o CEIP Marcos da Portela (Monte Porreiro) o Premio á Mellor Cantiga; o ACD de Campañó, o Premio á Mellor Interpretación e o CEIP Marcos da Portela (Monte Porreiro), o Premio á Mellor Coroa. Pola súa banda, o CEIP Marcos da Portela (Monte Porreiro) foi Premio Especial Maios 2009; e o Maio Viaxeiro do CEIP de Cabanas (Salcedo) acadou o Premio Especial do Xurado. Fotografías: G (Servizo de Cultura e Festas do Concello de Pontevedra)
Festa da cabaza 09
A praza de Curros Enríquez acolleu na mañá do sábado 28 de marzo unha nova edición desta feira e festa tradicional, con música, gastronomía e obradoiros. A festa da cabaza recupera a tradición dun mercado moi popular na Pontevedra do século XX, celebrado ao comezo da primavera e destinado principalmente á venda de produtos e aparellos que facilitaban o traballo no campo durante a recollida de froitos. Un dos máis presentes nesa celebración era a cabaza, usada como refrixerador de líquidos entre outros usos. Recordando a importancia deste froito, a Concellaría de Festas recuperou este mercado tradicional baixo o nome de ‘Feira e festa da cabaza’.
Os Bolechas
O sábado 28 de febreiro de 2009 o Café Moderno recibiu a visita de Os Bolechas, aos que acompañaron algúns dos 100 nenos que participaron na creación do seu último libro, 'A moda'. A publicación, que se presentaba neste acto, xurdiu a partir de tres obradoiros celebrados nos meses de maio e xuño na cidade de Pontevedra e impartidos polo creador destes personaxes, Pepe Carreiro. A actividade estivo promovida pola Concellaría de Dinamización Sociocultural, a través do servizo de Normalización Lingüística. Fotografías: Servizo de Normalización Lingüística.
Entroido 2009
Pontevedra desfrutou un ano máis do Entroido, protagonizado esta vez por un Ravachol que chegou vestido de banqueiro e disposto a repartir cartos entre a cidadanía para superar a crise. Dende a lectura do pregón o venres 20 de febreiro ata a incineración de Ravachol o venres 27, sucedeuse unha semana enteira chea de festexos e actividades, como o festival infantil, a mostra de parodias ou o concurso de murgas, ademais de, como non, a volta da botica de don perfecto Feijoo á praza da Peregrina.
Outono musical
O outono 08 en Pontevedra estivo marcado por 2 acontecementos musicais, como foron o Encontro Internacional de Pandeiros de Mao, 'DUF', e o ciclo de músicas prohibidas, 'Pecados', que celebrou a súa primeira edición con grande éxito. A quinta edición do 'DUF' coincidiu na mesma fin de semana que a tradicional 'Feira de outono', polo que compartiron programa e ambiente, enchendo as prazas da Ferrería e da Verdura de xente disposta a participar no amplo abano de actividades ofertadas arredor dos temas do outono e a música.
Día dos Calacús 08
A Concellaría de Cultura celebrou un ano máis o Día dos Calacús, convidando aos máis pequenos a decorar cabazas nos baixos da Casa da Luz. Alí reuníronse nenos e nenas, pais e nais, e xuntos ambientaron o casco vello coas velas e as cabazas propias desta tradición celta que se celebra na noite do 31 de outubro e noutros lugares recibe o nome de Samaín.
Verán de festas
Durante os meses de xullo, agosto e setembro, Pontevedra encheuse de actividade cultural de diversa índole. Multitude de actividades encheron as rúas de xente: o Festival de Jazz, Vibrasóns, Cinema na Lúa, Visitas teatralizadas... pero especialmente as Festas da Peregrina, celebradas entre o 9 e o 17 de agosto, e a Feira Franca, os días 5 e 6 de setembro. Algunhas das fotografías foron cedidas polo departamento de Festas do Concello de Pontevedra.
Bancos de Leiro
A praza de Concepción Areal dispón dende o pasado día 8 de agosto de dous singulares bancos creados polo artista galego Francisco Leiro. O escultor, de renome internacional, foi quen seleccionou esta praza para a súa ubicación definitiva, despois de ser retirados dunha perpendicular á rúa Riestra cando se cometeron obras de acondicionamento no entorno.
Visita do ministro de Cultura a Pontevedra
César Antonio Molina visitou na tarde do 5 de agosto diversas dotacións culturais da cidade nas que o Ministerio realizou diferentes aportacións económicas.Membros da corporativa municipal, así como outros representantes da vida política e cultural pontevedresa, recibiron ao ministro de Cultura na súa visita á cidade do Lérez. Todos eles fixeron un percorrido que os levou dende a recepción no Pazo de Mugartegui, ata a praza de Valentín Escudero, o novo edificio do Museo de Pontevedra, a Illa das Esculturas e, finalmente, ao Pazo da Cultura.
Unha cidade de jazz
O XVI Festival Internacional de Jazz e Blues de Pontevedra encheu as rúas de música e de xente entre os días 17 e 26 de xullo. Ademais do xa tradicional 'Pontejazz Workshop' -este ano a cargo do Ambrose Akinmusire Quintet- e de 'Jazz pola rúa' e 'Jam-sessions', destacaron os concertos ao aire libre. Na praza do Teucro actuaron Ambrose Akinmusire Quintet e Xan Campos Quinteto, mentres que na Ferrería se subiron ao escenario Ivan Lins -con Nnenna Freelon-, Johnny Winter, Kenny Barron Trio e Janiva Magness.
Nova imaxe da Peregrina
O luns 21 de xullo tiveron lugar os actos de celebración da fin das obras de restauración da Capela da Virxe Peregrina e o alumeado da nova iluminación. No acto interviñeron diferentes personalidades do Concello e da Comunidade, e a Banda Municipal de Pontevedra ofreceu o 'Concerto das campás', tocando de maneira coordinada coas campás do santuario. Ao acto asistiron centos de persoas.
Inauguración da XXX Bienal de Pontevedra
'Sen fronteiras. Converxencias artísticas hispanomagrebís' inaugurouse oficialmente o día 17 de xullo no novo edificio do Museo de Pontevedra e no Pazo da Cultura. No acto estiveron presentes representantes locais e autonómicos, así como altos representantes dos países do Magreb ao que se adica a Bienal: Túnez, Arxelia e Marrocos.
Celebración do Premio Nacional de Cultura
O día 20 de xuño o Concello de Pontevedra organizou diferentes actos para conmemorar o Premio Nacional de Patrimonio Cultural que lle foi concedido á cidade por parte da Consellaría de Cultura.A partir das 19:00 h os nenos puideron desfrutar de música e animacións nas prazas da Ferrería e de Curros Enríquez. Posteriormente, o Centro Social Caixanova acolleu un acto onde interviñeron representantes das institucións e entidades que colaboraron no proxecto de reurbanización de Pontevedra nos últimos anos.
Concerto de Calamaro
Andrés Calamaro puxo fin á edición 'Con Voz Propia' do ano 2008 cun concerto multitudinario no Recinto Feiral do Pazo da Cultura de Pontevedra o pasado día 7 de xuño.
Presentación de pontevedracultura
Pontevedracultura.org botou a andar oficialmente o venres 6 de xuño. A Casa das Campás, sede do vicerreitorado, acolleu o acto de presentación no que participaron a concelleira de Cultura, Universidade e Sociedade da Información, Lola Dopico, a delegada provincial da Consellaría de Industria, Montserrat Prado, e a responsable de contidos da nova web, Patricia Dopico. Canda elas tamén se xuntou unha cumprida representación do movemento asociativo e cultural pontevedrés. As fotografías son de Leandro Paz.
Encontro-Feira do Proxecto-Edición
A segunda edición do Encontro-Feira do Proxecto-Edición, organizado polo Centro Galego de Arte Contemporánea, tivo lugar na sala de exposicións do Pazo da Cultura os días 3, 4 e 5 de abril de 2008. Leváronse a cabo talleres, encontros, concertos e performances e puidéronse visitar os espazos dos colectivos, artistas e editores -nacionais e internacionais- que participaron na feira mostrando os seus proxectos.
Con Voz Propia: CocoRosie
Concerto de CocoRosie no Auditorio do Pazo da Cultura. CocoRosie supuxo un éxito de público dentro do ciclo Con Voz Propia que organiza a Concellaría de Cultura. As fotografías son obra de Fernando Cabeza.
